Azken hamarkadotan, inbasio biologikoek arreta handia piztu dute, eta ez alferrik, munduko ingurumenaren aldaketan inbasio horiek baitira gauzarik garrantzitsuenetako bat. Garai batean naturak bazuen, berez, hainbat oztopo gaindiezin (mendikateak, itsasoak, basamortuak), baina gaur egun, gizakiaren lana dela-eta (errepideak, itsas garraioa, turismoa), ez dute ezer askotarako balio.

Gaur egun, aitorturik dagoenez, espezie exotiko inbaditzaileak (EEI) dira biodibertsitatea galtzeko arrazoi nagusienetako bat, eta baliteke, uste baino lehenago, azkenean, ekologia, gaur egun ezagutzen dugun moduan, haien eraginez suntsitzea.

Hona hemen EEI horien definizioa: "Edozein espezie (animalia edo landarea), beste inguru biogeografiko batzuetatik datorrena eta inguru edo eskualde jakin batean berezkoa ez dena, baina bertan bere kasa egokitu, bizi, lehiatu eta ugaltzeko gai dena. Bertan, aldaketa-eragile bihurtzen da, bertako biologia-aniztasunerako mehatxua da, eta kolonizatzen dituen habitatetan eragin txarra du ingurumenerako, ekonomiarako eta osasunerako".